മഞ്ഞ, പിങ്ക് കാർഡ് അംഗങ്ങളുടെ ഇ-കെവൈസി മസ്റ്ററിങ് ഒക്ടോബർ ഒന്നു വരെ; ഞായറാഴ്ചയും സൗകര്യം.

മഞ്ഞ, പിങ്ക് കാർഡ് അംഗങ്ങളുടെ ഇ-കെവൈസി മസ്റ്ററിങ് ഒക്ടോബർ ഒന്നു വരെ; ഞായറാഴ്ചയും സൗകര്യം.

കോട്ടയം: ജില്ലയിലെ മുൻഗണനാ വിഭാഗം റേഷൻ കാർഡുകളിൽ (മഞ്ഞ, പിങ്ക്) പേര് ഉൾപ്പെട്ടിട്ടുള്ള മുഴുവൻ അംഗങ്ങളുടെയും ഇ- കെവൈസി മസ്റ്ററിങ് ഒക്ടോബർ ഒന്നു വരെ നടത്താം. മഞ്ഞ, പിങ്ക് കാർഡിൽ ഉൾപ്പെടുന്ന എല്ലാ അംഗങ്ങളും റേഷൻ കാർഡ്, ആധാർ കാർഡ് എന്നിവയുമായി റേഷൻ കടകളിലെത്തി ഇ പോസ് യന്ത്രം മുഖേന മസ്റ്ററിങ് നടത്തണണമെന്നു ജില്ലാ സപ്ലൈ ഓഫീസർ സ്മിത ജോർജ് അറിയിച്ചു.

        2024 ഓഗസ്റ്റ് അഞ്ചു മുതൽ നാളിതു വരെ റേഷൻ കടയിൽ ബയോമെട്രിക്ക് സംവിധാനം ഉപയോഗിച്ച് റേഷൻ വാങ്ങിയ വ്യക്തികളും 2024 ഫെബ്രുവരി-മാർച്ച് മാസങ്ങളിൽ ആദ്യഘട്ടത്തിൽ ഈ പോസ് വഴി ഇ-കെവൈസി അപ്ഡേഷൻ ചെയ്തവരും റേഷൻ കടയിലെത്തി വീണ്ടും ഇ-കെവൈസി മസ്റ്ററിങ് ചെയ്യേണ്ടതില്ല. 2024 ഓഗസ്റ്റ് അഞ്ചു മുതൽ നാളിതുവരെയുള്ള ബയോമെട്രിക്ക് സംവിധാനം ഉപയോഗിച്ച് റേഷൻ വാങ്ങിയ അംഗങ്ങൾ ഒഴികെയുള്ള മറ്റ് അംഗങ്ങൾ റേഷൻ കടയിലെത്തി മസ്റ്ററിങ് നടത്തണം. 

          2024 സെപ്റ്റംബർ 25 മുതൽ ഒക്ടോബർ 1 വരെ ഇ-കെവൈസി മസ്റ്ററിംഗിനു വേണ്ടി കോട്ടയം ജില്ലയിലെ എല്ലാ റേഷൻ കടകളുടെയും സമയക്രമം പുനക്രമീകരിച്ചിട്ടുണ്ട്. ഇതിൻപ്രകാരം, രാവിലെ എട്ടു മണി മുതൽ ഉച്ചയ്ക്ക് 12 മണി വരെ റേഷൻ വിതരണവും ഇകെവൈസി മസ്റ്ററിംഗും

ഉച്ചയ്ക്ക് 12 മണി മുതൽ ഒരു മണി വരെ ഇ-കെവൈസി മസ്റ്ററിംഗ് മാത്രവുമാണ് നടക്കുക.

വൈകുന്നേരം മൂന്നുമണി മുതൽ നാലു മണി വരെ ഇ-കെവൈസി  മസ്റ്ററിംഗും

വൈകുന്നേരം നാലുമണി മുതൽ ഏഴുമണി വരെ റേഷൻ വിതരണവും ഇകെവൈസി മസ്റ്ററിംഗും നടക്കും.

സെപ്റ്റംബർ 29 ഞായറാഴ്ച രാവിലെ ഒൻപതു മണി മുതൽ ഒരുമണി വരെയും വൈകുന്നേരം മൂന്നുമണി മുതൽ ആറുമണി വരെയും റേഷൻ കടകൾ വഴി ഇ കെവൈസി മസ്റ്ററിംഗ് നടത്താം. മുൻഗണനാ വിഭാഗം റേഷൻ കാർഡ് അംഗങ്ങൾ ഈ സേവനം പരമാവധി പ്രയോജനപ്പെടുത്തണം എന്നു ജില്ലാ സപ്ലൈ ഓഫീസർ അറിയിച്ചു. 

        ഇ പോസ് യന്ത്രത്തിൽ വിരൽ ഉപയോഗിച്ച് ഇ-കെവൈസി മസ്റ്ററിങ് നടത്താൻ സാധിക്കാത്തവർക്കു മറ്റൊരവസരം നൽകുന്നതായിരിക്കും. 10 വയസിൽ താഴെയുള്ള കുട്ടികളുടെ ആധാർ അപ്ഡേഷനു ശേഷം ഇ-കെവൈസി മസ്റ്ററിംഗ് ചെയ്യണം. കൂടുതൽ വിവരങ്ങൾക്ക് ജില്ല സപ്ലൈ ഓഫീസുമായി ബന്ധപ്പെടുക: ഫോൺ: 0481 2560371.