അങ്കമാലി - തൃശൂർ റൂട്ടിൽ ഗതാഗതക്കുരുക്ക് തുടരുന്നു.

അങ്കമാലി - തൃശൂർ റൂട്ടിൽ ഗതാഗതക്കുരുക്ക് തുടരുന്നു.

തൃശൂർ: ദേശീയപാതയിൽ മുരിങ്ങൂർ, ചാലക്കുടി ഭാഗത്ത് രൂക്ഷമായ ഗതാഗതക്കുരുക്ക് തുടരുകയാണ്. ഇവിടെ വാഹനങ്ങൾ വഴിതിരിച്ചു വിടുകയാണ്. 

       വെള്ളിയാഴ്ചയുണ്ടായ ഗതാഗതക്കുരുക്ക് 18 മണിക്കൂർ നീണ്ടിരുന്നു. വാഹനങ്ങൾ നിയന്ത്രിക്കാൻ ആമ്പല്ലൂരിലും ചാലക്കുടിയിലും ഇന്ന് കൂടുതൽ പൊലീസിനെ വിന്യസിച്ചിട്ടുണ്ട്. വലിയ വാഹനങ്ങൾ ഒഴികെയുള്ളവ ചെറിയ റോഡിലൂടെയാണ് കടത്തിവിടുന്നത്. 

      മുരിങ്ങൂർ പാലം കയറുന്നതിനു മുമ്പ് കാടുകുറ്റി അത്താണി വഴി എയർപോർട്ട് ജംക്ഷനു മുന്നിലുള്ള സിഗ്നലിലേക്കാണ് ചെറിയ വാഹനങ്ങളെ എത്തിക്കുന്നത്. വലിയ വാഹനങ്ങൾ മുരിങ്ങൂർ പാലം വഴിയാണ് കടത്തി വിടുന്നത്. ചാലക്കുടി പോട്ട പാലത്തിനു മുമ്പും പൊലീസുകാരെ വിന്യസിച്ചിട്ടുണ്ട്. അഷ്‌ടമിച്ചിറ -മാള വഴി എറണാകുളത്തേക്ക് പോകാനാണ് വാഹനങ്ങളോട് പൊലീസ് നിർദ്ദേശിക്കുന്നത്.