സ്വതന്ത്രവും നീതിയുക്തവുമായ തെരഞ്ഞെടുപ്പ് നടന്നില്ല; ഉദ്യോഗസ്ഥരുടെ അനാസ്ഥ അന്വേഷിക്കണമെന്ന് വി.ഡി. സതീശന്.
സംസ്ഥാനത്ത് സ്വതന്ത്രവും നീതിയുക്തവുമായ തെരഞ്ഞെടുപ്പ് നടന്നില്ലെന്ന് പ്രതിപക്ഷ നേതാവ് വി.ഡി. സതീശന്. കനത്ത ചൂടില് പല ബൂത്തുകളിലും വോട്ടര്മാര് മണിക്കൂറുകള് കാത്തുനിന്ന ശേഷം മടങ്ങി. മടങ്ങിപ്പോയി തിരികെ വന്നവരില് പലര്ക്കും വോട്ട് ചെയ്യാന് അവസരം ലഭിച്ചില്ലെന്നും അദ്ദേഹം വാര്ത്താക്കുറിപ്പില് പറഞ്ഞു.
ആറ് മണിക്ക് മുന്പ് പോളിംഗ് സ്റ്റേഷനില് എത്തിയിട്ടും വോട്ട് ചെയ്യാനാകാത്ത സാഹചര്യവും പലയിടങ്ങളിലും ഉണ്ടായി. മിക്കയിടത്തും മന്ദഗതിയിലാണ് വോട്ടിംഗ് നടന്നത്. നാലര മണിക്കൂര് വരെ ചില വോട്ടര്മാര്ക്ക് കാത്തു നില്ക്കേണ്ടി വന്നതായി റിപ്പോര്ട്ടുണ്ട്. ഉദ്യോഗസ്ഥതലത്തില് ഗുരുതരമായ അനാസ്ഥയുണ്ടായെന്ന് സംശയിക്കാവുന്ന തരത്തിലാണ് വോട്ടിംഗ് നടന്നത്. പോളിംഗ് ശതമാനം കുറയാന് കാരണമായതും ഉദ്യോഗസ്ഥ തലത്തിലെ മെല്ലെപ്പോക്കാണ്. വോട്ടിംഗ് യന്ത്രങ്ങള്ക്ക് തകരാര് കണ്ടെത്തിയ ബൂത്തുകളില് പോളിംഗ് സമയം ദീര്ഘിപ്പിച്ച് നല്കിയില്ല. സമീപകാലത്തെങ്ങും ഇത്രയും മോശപ്പെട്ട രീതിയില് തെരഞ്ഞെടുപ്പ് ക്രമീകരണങ്ങള് ഉണ്ടായിട്ടില്ല. ഇതേക്കുറിച്ച് അന്വേഷണം വേണമെന്നും പ്രതിപക്ഷ നേതാവ് ആവശ്യപ്പെട്ടു.
0 Comments