ഈ മാസം വിരമിക്കുന്നത് 1099 പേർ; മഴക്കാലം വരുന്നതോടെ വൈദ്യുതി ബോർഡിൽ രൂക്ഷമായ തൊഴിലാളി ക്ഷാമം.

ഈ മാസം വിരമിക്കുന്നത് 1099 പേർ; മഴക്കാലം വരുന്നതോടെ വൈദ്യുതി ബോർഡിൽ രൂക്ഷമായ തൊഴിലാളി ക്ഷാമം.

 

തിരു.: സംസ്ഥാനത്ത് വേനൽ മാറി മൺസൂൺ കാലത്തിലേക്ക് കടക്കാനൊരുങ്ങവേ വൈദ്യുതി ബോർഡിൽ രൂക്ഷമായ തൊഴിലാളി ക്ഷാമം. വൈദ്യുതി ബോർഡിൽ ഈ മേയ് 31ന് മാത്രം വിരമിക്കാനൊരുങ്ങുന്നത് 1099 പേരാണ്. കഴിഞ്ഞ മേയിൽ 899 പേർ വിരമിച്ചിരുന്നു. കഴിഞ്ഞ വർഷം ആകെ 1300 പേരാണ് വിരമിച്ചത്. പുതിയ നിയമനങ്ങൾ നടക്കാത്തതിനാൽ ലൈൻമാൻമാരുടെ വലിയ കുറവുണ്ട്. രൂക്ഷമായ പ്രതിസന്ധിയാണ് ഇതുണ്ടാക്കുന്നത്.

         ഇത് പരിഹരിക്കാൻ വിരമിച്ചവരെ 750 രൂപ ദിവസക്കൂലിക്ക് നിയമിക്കാനാണ് തീരുമാനം. 65 വയസ്സു വരെയുള്ള താഴെത്തട്ടിലുള്ള പുതിയ നിയമനങ്ങൾ യോഗ്യത സംബന്ധിച്ച തർക്കങ്ങൾ കാരണം കോടതി കയറി മുടങ്ങിയിരുന്നു. ഇതിനുപുറമേ, തസ്തികകളുടെ പുനഃസംഘടന പൂർത്തിയാകും വരെ ഒരു തസ്തികയിലെയും ഒഴിവുകൾ പി എസ് സിക്ക് റിപ്പോർട്ട് ചെയ്യേണ്ടെന്നാണ് മാനേജ്‌മെന്റിന്റെ തീരുമാനം.

          ലൈൻമാൻ, വർക്കർ തസ്തികകളിലെ ജീവനക്കാരുടെ കുറവ് വേനൽക്കാലത്ത് വലിയ പ്രശ്നങ്ങളുണ്ടാക്കിയിരുന്നു. മഴക്കാലമാകുന്നതോടെ കാറ്റിലും മഴയിലും മരങ്ങളും പോസ്റ്റുകളും കടപുഴകി വീഴാനുള്ള സാധ്യത കുടുതലാണ്. സംസ്ഥാനമൊട്ടാകെ ഇതിൻ്റെ അറ്റകുറ്റപണികൾക്കും മറ്റും കൂടുതൽ പേരെ ആവശ്യമായി വരുന്ന സമയത്താണ് നിലവിലുള്ള തൊഴിലാളി പ്രതിസന്ധി രൂക്ഷമാകുന്നത്. ഭീമമായ ശമ്പളം വാങ്ങിയിരുന്ന എത്ര പേർ 750 രൂപയ്ക്ക് ജോലിക്കെത്തുമെന്നും ആശങ്കയുണ്ട്. ആകെ 30,321 ജീവനക്കാരെയാണ് റെഗുലേറ്ററി കമ്മീഷൻ അനുവദിച്ചിട്ടുള്ളത്. എന്നാൽ, നിലവിൽ 28,044 പേരാണുള്ളത്. ഇതിൽ നിന്നാണ് 1099 പേർ കൂടി വിരമിക്കുന്നത്. ആകെ 3376 ജീവനക്കാരുടെ കുറവാണ് നിലവിലുള്ളത്. ഇത് ഒരു മഴ പെയ്താലുടൻ കരണ്ട് പോകുന്ന നമ്മുടെ നാട്ടിൽ വലിയ വൈദ്യുതി പ്രതിസന്ധിയാണുണ്ടാക്കുക.