സംസ്ഥാനത്തെ സാമ്പത്തിക പ്രതിസന്ധി വീണ്ടും രൂക്ഷമാകുകയാണ്; വി.ഡി. സതീശൻ.
തൃശൂർ: സംസ്ഥാനത്തെ സാമ്പത്തിക പ്രതിസന്ധി വീണ്ടും രൂക്ഷമാകുകയാണെന്ന് പ്രതിപക്ഷ നേതാവ് വി.ഡി. സതീശൻ. ബജറ്റില്‍ അനുവദിച്ച പദ്ധതികള്‍ അതിന്റെ നടപടിക്രമങ്ങള്‍ പൂർത്തിയാക്കി ഭരണാനുമതി കൊടുക്കേണ്ട ഘട്ടത്തില്‍ പ്രത്യേക ഉത്തരവിലൂടെ ഭരണാനുമതി കൊടുക്കേണ്ടെന്ന് ധനവകുപ്പ് തീരുമാനിക്കുന്നു. പ്ലാൻ എ ഇല്ലെങ്കില്‍ പ്ലാൻ ബി എന്നാണ് നേരത്തെ പറഞ്ഞത്. എന്താണ് പ്ലാൻ ബി എന്ന് മനസിലാകുന്നില്ലെന്നും വി.ഡി. സതീശൻ ഇന്നലെ തൃശൂരില്‍ മാധ്യമങ്ങളോട് പറഞ്ഞു.
സർവ്വീസ് ചാർജുകള്‍ വർദ്ധിപ്പിക്കാനാണ് നീക്കമെങ്കില്‍ അതിനെ എതിർക്കും. ഇനി ഒരു തരത്തിലുള്ള നികുതിവർദ്ധനവും അംഗീകരിക്കില്ല. ജനങ്ങള്‍ക്ക് ജീവിക്കാൻ പറ്റാത്ത അവസ്ഥയാണ്. സാമ്പത്തിക പ്രതിസന്ധി പരിഹരിക്കാൻ ഒരു മാർഗ്ഗവുമില്ല. സിപിഎമ്മിന്റെ പിആർ പരിപാടി കൊണ്ട് ഭക്ഷണം കഴിക്കാൻ പറ്റില്ല. ക്യാപ്സ്യൂള്‍ വിതരണം കൊണ്ട് മാവേലി സ്റ്റോറില്‍ സാധനം എത്തില്ല.
ആശുപത്രിയില്‍ മരുന്ന് വരില്ല. കെഎസ്ആർടിസി ബസ് ഓടുകയുമില്ല. ഈ സ്ഥിതിയിലേക്കാണ് കാര്യങ്ങള്‍ പോകുന്നത്. ഓണം സീസണ്‍ വരുകയാണ്. സർക്കാർ ഒരുപാട് കാര്യങ്ങള്‍ ചെയ്യേണ്ട സമയമാണ്. വിലക്കയറ്റം ഇല്ലാതാക്കാൻ നടപടി സ്വീകരിക്കേണ്ട സമയത്ത് അഞ്ച് നയാപൈസ കയ്യിലില്ല. നികുതി വരുമാനം വർദ്ധിപ്പിക്കാനും നടപടിയില്ല. പ്രശ്നങ്ങള്‍ അതിരൂക്ഷമാണ്. വയനാട് ദുരന്തത്തിൽ സർക്കാർ കൊടുക്കുന്ന നിവേദനത്തിന്റെ അടിസ്ഥാനത്തില്‍ ആശ്വാസ പദ്ധതി പ്രഖ്യാപിക്കുമെന്നാണ് പ്രധാനമന്ത്രി ഇന്നലെ പറഞ്ഞത്. സർക്കാർ ഇന്നലെ തന്നെ നിവേദനം കൊടുത്തോ എന്നറിയില്ല. പ്രധാനമന്ത്രി വരുമ്പോള്‍ പുനരധിവാസ പ്രവർത്തനങ്ങളെ കുറിച്ചുള്ള വിശദമായ റിപ്പോർട്ട് നല്‍കേണ്ടതാണ്. ഇതുവരെ കൊടുത്തിട്ടില്ലെന്നാണ് മനസിലാക്കുന്നത്. ഇന്നോ നാളയോ അത് കൊടുക്കട്ടെ. സംസ്ഥാനത്തിന്റെ ആവശ്യം അനുസരിച്ച്‌ കേന്ദ്ര സർക്കാർ തീരുമാനം എടുക്കുമെന്ന് പ്രതീക്ഷിക്കുന്നുവെന്നും പ്രതിപക്ഷ നേതാവ് വ്യക്തമാക്കി.
0 Comments