ആത്മവിശ്വാസം കുറയാതെ; 'മൊട്ട സംഗമം' തരംഗമായി.
തൃശൂർ: വടക്കുനാഥന്റെ മണ്ണിൽ മരത്തണലിൽ അവർ ഒന്നിച്ചു കൂടി, ലോകത്തിന് വലിയ ഒരു സന്ദേശം നല്കാൻ. സമൂഹത്തിന്റെ വ്യത്യസ്ത മേഖലകളിൽ നിന്നുമായുള്ള മൊട്ടകളുടെ സംഗമം പുതിയ അനുഭവമായി. ആത്മവിശ്വാസത്തിന് ഒട്ടും കുറവ് വരുത്താത്തതായി ഈ സംഗമം. മുടിയില്ലാത്ത കാരണത്താൽ മാനസിക പിരിമുറുക്കം നേരിടുന്നവരുടെ എണ്ണം വർദ്ധിച്ചു വരുന്ന സാഹചര്യത്തില്‍, അവർക്കിടയിൽ ആത്മവിശ്വാസം പകരുക എന്ന ലക്ഷ്യമാണ് ഇതിന്റെ പിന്നിൽ. മൊട്ടകളുടെ ആദ്യസംഗമമാണ് തൃശൂർ തേക്കിന്‍കാട് മൈതാനത്ത് നടന്നത്.
മുമ്പ് വിഗ് വെച്ചവർ തലമുടി മുണ്ഡനം ചെയ്തപ്പോൾ ലഭിച്ച സന്തോഷം പങ്കു വെച്ചു. മാത്രമല്ല കോവിഡ് കാലത്തെ ബുദ്ധിമുട്ടുകളുടെ പഞ്ചാത്തലത്തിൽ മുണ്ഡനം ചെയ്തവരുടെ അനുഭവങ്ങൾ പങ്കുവെച്ചപ്പോൾ വേനൽക്കാലത്ത് ആശ്വാസത്തോടെ കഴിയുന്നതിന്റെ സുഖവും പങ്കുവെച്ചപ്പോൾ കാണികൾക്ക് കൗതുകം. ആദ്യസംഗമത്തിൽ 25 പേർ പങ്കെടുത്തു. സമൂഹ, പത്ര, ദൃശ്യ മാധ്യമങ്ങളിൽ വാർത്ത ആയതോടെ ആഗോളതലത്തിൽ മൊട്ടകളുടെ സംഘടന ഉണ്ടാക്കാനാണ് ഇവർ ലക്ഷ്യമിടുന്നത്. 'മൊട്ട ഗ്ലോബൽ' എന്ന വാട്ട്സാപ്പ് കൂട്ടായ്മയിൽ ഇതിനോടകം നൂറിലധികം പേർ അംഗങ്ങളായതായി സംഘാടകരിൽ ഒരാളായ സജീഷ് കുട്ടനെല്ലൂർ പറഞ്ഞു.
0 Comments