മുനമ്പം പ്രശ്നം ഒറ്റ ദിവസം കൊണ്ട് തീർക്കാം, കേരളത്തിലെ മുസ്ലീം സംഘടനകള്‍ എല്ലാം മുനമ്പത്തുകാർക്കൊപ്പം; പി.കെ. കുഞ്ഞാലിക്കുട്ടി.
തൃശൂർ: മുനമ്പത്തെ പ്രശ്നം ഒറ്റ ദിവസം കൊണ്ട് തീർക്കാവുന്നതാണെന്നും കേരളത്തിലെ മുസ്ലീം സംഘടനകള്‍ എല്ലാം മുനമ്പത്തുകാർക്ക് ഒപ്പമാണെന്നും മുസ്ലീം ലീഗ് അഖിലേന്ത്യാ ജനറല്‍ സെക്രട്ടറി പി.കെ. കുഞ്ഞാലിക്കുട്ടി. മുനമ്പത്തുകാരോട് മുസ്ലീം സംഘടനകള്‍ക്ക് അനുഭാവപൂർണ്ണമായ നിലപാടാണ് ഉള്ളതെന്ന് എറണാകുളത്തെ ജനപ്രതിനിധികളെയും ബിഷപ്പുമാരെയും അറിയിച്ചിട്ടുണ്ടെന്നും പി.കെ. കുഞ്ഞാലിക്കുട്ടി പറഞ്ഞു. ആരെയും കുടിയിറക്കരുത്. നിലവില്‍ അവിടെ താമസിക്കുന്നവർക്ക് സ്വന്തം ഭൂമിയില്‍ നിയമപരമായ രേഖകള്‍ നല്‍കണമെന്നാണ് മുസ്ലീം സഘടനകളുടെയും ഫാറൂഖ് കോളേജിന്റയും നിലപാടെന്നും അദ്ദേഹം പറഞ്ഞു. വിഷയത്തിലുള്ള പരിഹാരം സർക്കാർ നീട്ടിക്കൊണ്ടു പോകുന്നതിലൂടെ വർഗ്ഗീയ മുതലെടുപ്പ് നടത്തുന്നവർക്ക് വളമാവുകയാളെന്നും അദ്ദഹം ആരോപിച്ചു.
മുനമ്പം വിഷയത്തില്‍ മുസ്ലിം സംഘടനകള്‍ക്ക് യാതൊരു പങ്കുമില്ലെങ്കിലും അവരെ ബോധപൂർവ്വം ചിലർ കുറ്റപ്പെടുത്തുന്നു. പൂരമായാലും പെരുന്നാളായാലും കലക്കി വർഗ്ഗീയ പ്രചരണത്തിന് ആയുധമാക്കാൻ ശ്രമിക്കുന്നവർക്ക് ഈ പ്രശ്നം പരിഹരിക്കാൻ താത്പര്യമില്ലെന്നും അദ്ദേഹം പറഞ്ഞു.വി.എസ്. അച്യുതാനന്ദന്റെ കാലത്തെ മന്ത്രിസഭാതീരുമാന പ്രകാരമുള്ള നടപടികളാണ് നിലവിലെ പ്രശ്നത്തിന് കാരണം. ഭൂമി വഖഫ് ആണെന്നാണ് കോടതി നിലപാട്. അതേസമയം, ഭൂമി തങ്ങള്‍ക്ക് സമ്മാനമായി കിട്ടിയതാണെന്നും ക്രയവിക്രയത്തിന് അനുമതി ഉണ്ടെന്നും ഫാറുഖ് കോളേജ് അധികൃതരും പറയുന്നു. എന്നാല്‍, വിഷയത്തില്‍ കോടതിക്ക് പുറത്ത് വച്ച്‌ ചർച്ച നടത്തി പരിഹാരമുണ്ടാക്കണമെന്നാണ് മുസ്ലീം സംഘടനകളുടെ കോർഡിനേഷൻ കമ്മിറ്റി യോഗം അഭിപ്രായപ്പെട്ടത്.
0 Comments