ട്രെയിനിറങ്ങിയാൽ ഇ- സ്കൂട്ടർ റെഡി; പദ്ധതിയുമായി ദക്ഷിണ റെയിൽവേ.
മംഗളൂരു: തീവണ്ടിയിലെത്തി ഇ-സ്കൂട്ടർ വാടകയ്ക്കെടുത്ത് കറങ്ങാൻ റെയിൽവേ സ്റ്റേഷനുകളിൽ സൗകര്യം ഒരുങ്ങുന്നു. കാസർകോട് മുതൽ പൊള്ളാച്ചി വരെ 15 സ്റ്റേഷനുകളിൽ റെയിൽവേ ഇലക്ട്രിക് ഇരുചക്രവാഹനം വാടകയ്ക്ക് നൽകുന്നതിനായി മംഗളൂരുവിൽ കരാർ നൽകി.
കോഴിക്കോട് ഉൾപ്പെടെ വലിയ സ്റ്റേഷനുകൾക്കു പുറമെ ഫറൂഖ്, പരപ്പനങ്ങാടി പോലെ ചെറിയ സ്റ്റേഷനുകളിലും ഇലക്ട്രിക് ഇരുചക്രവാഹനമെത്തും. മണിക്കൂർ /ദിവസ വാടകയ്ക്കാണ് വാഹനം നൽകുക. അവ സൂക്ഷിക്കാനുള്ള സ്ഥലം റെയിൽവേ നൽകും. കരാറുകാരാണ് സംരംഭം ഒരുേക്കണ്ടത്. വാഹനം എടുക്കാനെത്തുന്നവരുടെ ആധാർ കാർഡ്, ലൈസൻസ് എന്നിവ ഉൾപ്പെടെയുള്ള രേഖകളുടെ പരിശോധനയുണ്ടാകും. പൊള്ളാച്ചി, ഒറ്റപ്പാലം, നിലമ്പൂർ, കോഴിക്കോട്, തിരൂർ, ഫറൂഖ്, പരപ്പനങ്ങാടി, വടകര, മാഹി, തലശ്ശേരി, കണ്ണൂർ, പയ്യന്നൂർ, കാഞ്ഞങ്ങാട്, കാസർകോട്, മംഗളൂരു ജങ്ഷൻ എന്നീ സ്റ്റേഷനുകളിലാണ് ഇ -സ്കൂട്ടറുകൾ വരുക.
തിരുവനന്തപുരം ഡിവിഷനിൽ എറണാകുളം, തിരുവനന്തപുരം ഉൾപ്പെടെ വലിയ സ്റ്റേഷനുകളിൽ നിലവിൽ ബൈക്ക് (റെന്റ് എ ബൈക്ക്) വാടകയ്ക്ക് നൽകുന്നുണ്ട്.
0 Comments