എന്റെ കേരളം പ്രദർശന വിപണന മേള: മഴയ്ക്കൊപ്പം സംഗീത സാഗരവും.

പത്തനംതിട്ട: കോരിച്ചൊരിയുന്ന മഴയത്ത് നഗരരാവിനെ സംഗീത സാഗരമാക്കി ഡെന്നിസ് ബാബുവും ശ്രീലക്ഷ്മിയും നയിച്ച ഗ്രൂവ് മ്യൂസിക് ബാൻഡ്. ശബരിമല ഇടത്താവളത്തിൽ എന്റെ കേരളം പ്രദര്‍ശന വിപണന മേളയിലാണ് ഓരോ ഗാനത്തിലും ആവേശവും മെലഡിയും കോര്‍ത്തിണക്കിയ പാട്ടുകളുടെ മാന്ത്രികത സദസ്സിനെ ആവേശത്തിലാഴ്ത്തിയത്.

      കാണികളുടെ പൾസറിഞ്ഞു പത്തനംതിട്ട ഇടത്താവളത്തെ ഹരം കൊള്ളിച്ച് ഇല്ലുമിനാറ്റിയും കൊക്കരക്കോയും ഗായകർ പാടി തിമിർത്തപ്പോൾ സദസ്സും ഒപ്പം ചേർന്നു. വസീഗരയിലും അങ്ങ് വാന കോണില്… എന്നീ ഗാനങ്ങളിൽ വയലിൻ സംഗീതം തീർത്ത് ഗ്രൂവിലെ വയലിനിസ്റ്റ് വിഷ്ണു എം. ഭുവനേശ്വരി സംഗീതപ്രേമികൾക്ക് വിരുന്നൊരുക്കി. ഡ്രമ്മര്‍ ജസന്‍ മാത്യു, ഗിറ്റാറിസ്റ്റ് എ.എസ്. അര്‍ജ്ജുന്‍, ബേസ് ഗിറ്റാറിസ്റ്റ് ഡാനി, കീബോര്‍ഡിസ്റ്റ് പ്രബിന്‍ പ്രകാശ്, സൗണ്ട് എഞ്ചിനീയര്‍ ഷിജു എന്നിവരാണ് ഷോ അവതരിപ്പിച്ചത്.