വ്യാപാര സമുച്ചയത്തിൽ തീപിടിത്തം: അമ്പതോളം കടകൾ കത്തി നശിച്ചു.

വ്യാപാര സമുച്ചയത്തിൽ തീപിടിത്തം: അമ്പതോളം കടകൾ കത്തി നശിച്ചു.

കണ്ണൂർ: തളിപ്പറമ്പിൽ വ്യാപാര സമുച്ചയത്തിൽ 50 ഓളം കടകളിൽ തീപിടിത്തം. ബസ് സ്റ്റാൻഡിനു സമീപത്തെ കെവി കോംപ്ലക്സിലുള്ള കളിപ്പാട്ട വിൽപ്പനശാലയിൽ വൈകുന്നേരം അഞ്ചുമണിയോടെ ആണ് തീപിടിത്തം ഉണ്ടായത്. ഇത് സമീപത്തെ മറ്റു കടകളിലേക്കും പടരുകയായിരുന്നു. മൂന്നു നില കെട്ടിടത്തിലെ 10 കടകൾ പൂർണ്ണമായും കത്തിയമർന്നു. അഗ്നിരക്ഷാസേനയുടെ നേതൃത്വത്തിൽ വളരെ പണിപ്പെട്ടാണ് തീ നിയന്ത്രണ വിധേയമാക്കിയത്. ആളപായമുണ്ടായതായി വിവരമില്ല. രണ്ടു കോംപ്ലക്‌സുകളിലെ അൻപതോളം സ്‌ഥാപനങ്ങളിലേക്ക് തീ പടർന്നതായി വ്യാപാരികളുടെ പ്രതിനിധി പറഞ്ഞു.

         തീപിടിത്തമുണ്ടായ കടയ്ക്ക് സമീപത്തെ തുണിക്കടകളിലേക്കും മൊബൈൽ ഫോൺ വിൽപ്പന ശാലകളിലേക്കും തീ പടർന്നതാണ് സ്‌ഥിതി ഗുരുതരമാക്കിയത്. കടകളിലെ ഗ്യാസ് സിലിണ്ടറുകൾ പൊട്ടിത്തെറിച്ചത്, തീ അതിവേഗം പടരാൻ കാരണമായി. കോംപ്ലക്സിൽ നിരവധി കടകൾ പ്രവർത്തിക്കുന്നുണ്ട്. ഉള്ളിലെ കടകളിലേക്കും തീ പടർന്നോയെന്ന് വ്യക്തമല്ല. ജില്ലയുടെ വിവിധ ഭാഗങ്ങളിലെ അഗ്നിരക്ഷാസേനാ യൂണിറ്റുകൾ സ്ഥലത്തെത്തിയാണ് തീയണച്ചത്.