ശബരിമല മണ്ഡല- മകരവിളക്ക് തീർത്ഥാടനം: ഒരുക്കങ്ങള് ദ്രുതഗതിയില് പൂർത്തിയാക്കും.
തിരു.: ശബരിമലയിലെ ഈ വർഷത്തെ മണ്ഡല-മകരവിളക്ക് തീർത്ഥാടനത്തിനായുള്ള ഒരുക്കങ്ങള് ദ്രുതഗതിയില് പൂർത്തിയാക്കാൻ മന്ത്രി വി.എൻ. വാസവൻ നിർദ്ദേശം നല്കി. തീർഥാടന മുന്നൊരുക്കങ്ങള് വിലയിരുത്തുന്നതിനായി മന്ത്രിയുടെ അദ്ധ്യക്ഷതയില് സെക്രട്ടേറിയേറ്റ് ദർബാർ ഹാളില് ചേർന്ന അവലോകന യോഗത്തിലാണ് നിർദ്ദേശം നല്കിയത്. ആഗോള അയ്യപ്പസംഗമം, രാഷ്ട്രപതിയുടെ ശബരിമല സന്ദർശനം എന്നിവയുടെ ഭാഗമായി ഇത്തവണ നേരത്തെതന്നെ മുന്നൊരുക്കങ്ങള് ആരംഭിച്ചിരുന്നു.
നേരത്തെ രണ്ട് അവലോകന യോഗങ്ങള് പൂർത്തിയാക്കുകയും നിർദ്ദേശങ്ങള് സമയബന്ധിതമായി നടപ്പിലാക്കുകയും ചെയ്തിരുന്നു. ഈ വർഷം കൂടുതല് തീർത്ഥാടകർ എത്തിച്ചേരുമെന്ന നിലയില് വേണം ക്രമീകരണങ്ങള് മുന്നോട്ടു കൊണ്ടുപോകേണ്ടതെന്ന് മന്ത്രി പറഞ്ഞു. തീർത്ഥാടകർക്ക് അപ്പവും അരവണയും ഒരു മുടക്കവും കൂടാതെ ലഭ്യമാക്കുന്നതിനായി വൃശ്ചികം ഒന്നിന് 50 ലക്ഷം മുതല് 65 ലക്ഷം വരെ പായ്ക്ക് ബഫർ സ്റ്റോക്ക് തയ്യാറാക്കും. നിലവില് 15 ലക്ഷം സ്റ്റോക്ക് ലഭ്യമാക്കിയിട്ടുണ്ട്. വിർച്വല് ക്യൂ സംവിധാനത്തില് ഇത്തവണയും കഴിഞ്ഞ വർഷത്തെപ്പോലെ എൻട്രി പോയിൻ്റുകളില് ബുക്കു ചെയ്യുന്നതിന് സൗകര്യമൊരുക്കും. ആധാർ കാർഡ് ഉള്പ്പെടെയുള്ള തിരിച്ചറിയല് കാർഡിലൂടെയാണ് ഇതിനായുള്ള രജിസ്ട്രേഷൻ സൗകര്യമുണ്ടാകുക.
ശബരിമല തീർത്ഥാടനത്തിനെക്കുറിച്ച് അറിഞ്ഞിരിക്കേണ്ട വിവരങ്ങള് ഉള്പ്പെടുത്തിക്കൊണ്ട് തീർത്ഥാടകർക്കായി മൊബൈല് ആപ്ലിക്കേഷൻ ദേവസ്വം ബോർഡ് സജ്ജമാക്കും. കഴിഞ്ഞ വർഷം ആരംഭിച്ച തീർത്ഥാടകർക്കുള്ള ഇൻഷ്വറൻസ് പരിരക്ഷ ഇത്തവണ കേരളം മുഴുവൻ ലഭ്യമാക്കുന്നതിനും തീരുമാനം എടുത്തിട്ടുണ്ട്. തീർത്ഥാടകരുടെ സൗകര്യങ്ങള് ഉറപ്പാക്കുന്നതിന് പത്തനംതിട്ട, ഇടുക്കി, കോട്ടയം ജില്ലാ ഭരണകൂടങ്ങളുടെ നേതൃത്വത്തില് ഒരുക്കങ്ങള് പൂർത്തിയായി വരുന്നു. സുരക്ഷിത തീർത്ഥടനം ഉറപ്പാക്കാൻ വിവിധ ഭാഷകളില് അറിയിപ്പ് ബോർഡുകള് സ്ഥാപിക്കും.
0 Comments