ശബരിമലയില് അന്നദാനമായി കേരള സദ്യ നല്കും.
ശബരിമല: ശബരിമലയില് അന്നദാനമായി കേരള സദ്യ നല്കാന് തീരുമാനിച്ചതായി തിരുവിതാംകൂര് ദേവസ്വം ബോര്ഡ് പ്രസിഡന്റ് കെ. ജയകുമാര്. സദ്യയുടെ ഭാഗമായി പപ്പടവും പായസവും അച്ചാറും നല്കുമെന്നും ജയകുമാര് പറഞ്ഞു. തിരുവിതാംകൂര് ദേവസ്വം ബോര്ഡ് യോഗ തീരുമാനങ്ങള് മാധ്യമങ്ങളോട് വിശദീകരിക്കുകയായിരുന്നു ജയകുമാര്.
'അന്നദാനമായി പുലാവും സാമ്പാറും നല്കുന്ന വിചിത്രമായ മെനുവാണ് നിലനിന്നിരുന്നത്. ഉത്തരേന്ത്യക്കാര്ക്ക് ഇഷ്ടമായ പുലാവും ദക്ഷിണേന്ത്യക്കാര്ക്ക് ഇഷ്ടമായ സാമ്പാറും ചേര്ത്ത് ദേശീയ ഐക്യത്തിന്റെ പ്രതീകമായാണ് അങ്ങനെ നല്കിയിരുന്നത്. ഇത് ഭക്തജനങ്ങള്ക്ക് ഹിതകരമായിരുന്നില്ല. അതുമാറ്റി കേരള സദ്യ നല്കാന് ഇന്ന് തീരുമാനിച്ചു. പപ്പടവും പായസവും ചേര്ത്ത് കൊടുക്കും. എത്രയും പെട്ടെന്ന് ഇത് നടപ്പാക്കാന് കമ്മീഷണറോട് പറഞ്ഞിരിക്കുകയാണ്. നാളെ അല്ലെങ്കില് മറ്റന്നാള് നിലവില് വരും. പന്തളത്തെ അന്നദാനവും മെച്ചപ്പെടുത്തും'- കെ. ജയകുമാര് പറഞ്ഞു.
0 Comments