സംസ്ഥാനത്ത് പവർകട്ട് വേണമെന്ന് വീണ്ടും ആവശ്യപ്പെട്ട് കെഎസ്ഇബി.

സംസ്ഥാനത്ത് പവർകട്ട് വേണമെന്ന് വീണ്ടും ആവശ്യപ്പെട്ട് കെഎസ്ഇബി.

തിരു.: സംസ്ഥാനത്ത് പവർകട്ട് വേണമെന്ന് കെഎസ്ഇബി സർക്കാരിനോട് വീണ്ടും ആവശ്യപ്പെട്ടു. ഓവർലോഡ് കാരണം പലയിടത്തും അപ്രഖ്യാപിത ലോഡ് ഷെഡിങ് ഏര്‍പ്പെടുത്തേണ്ടി വരുകയാണ്. ഇതുവരെ എഴുന്നൂറിലധികം ട്രാൻസ്ഫോർമറുകൾക്ക് തകരാറ് സംഭവിച്ചെന്നും കെഎസ്ഇബി.      സാഹചര്യം ചര്‍ച്ച ചെയ്യാന്‍ കെഎസ്ഇബി ഇന്ന് ഉന്നതതല യോഗം ചേർന്നേക്കും.

       അതേസമയം, സംസ്ഥാനത്തെ വൈദ്യുതി ഉപഭോഗം സർവ്വകാല റിക്കോർഡിലെത്തി. ഇന്നലെ 11.31 കോടി യൂണിറ്റാണ് ഉപയോഗിച്ചത്. വൈദ്യുതിയുടെ പീക്ക് സമയ ആവശ്യകതയും റിക്കോർഡിലെത്തി. 5646 മെഗാവാട്ടാണ് പീക്ക് സമയത്തെ ആവശ്യകത. 

       കൂടുതൽ ഡാമുകൾ നിർമ്മിക്കാതെ സംസ്ഥാനത്തെ വൈദ്യുതക്ഷാമം പരിഹരിക്കാൻ ആവില്ലെന്ന് വൈദ്യുതി മന്ത്രി കെ. കൃഷ്ണൻകുട്ടി അഭിപ്രായപ്പെട്ടു. ജലവൈദ്യുത പദ്ധതികളോടുള്ള ആളുകളുടെ മനോഭാവം മാറണം. ഇന്നലെ മാത്രം ഉപയോഗിച്ചത് 113 ദശലക്ഷം മെഗാവാട്ടാണ്. നിയന്ത്രിച്ചില്ലെങ്കിൽ വലിയ പ്രശ്നത്തിലേക്ക് പോകും. പീക്ക് മണിക്കൂറുകളിൽ അമിതമായ ലോഡ് വരുന്നതാണ് അപ്രഖ്യാപിത പവർ കട്ടിനു കാരണം. ജീവനക്കാരെ ഭീഷണിപ്പെടുത്തിയിട്ട് കാര്യമില്ലെന്നും മന്ത്രി പറഞ്ഞു. 

         അതേസമയം, തുടർച്ചയായി രാത്രിയിൽ വൈദ്യുതി മുടങ്ങുന്നതായി വ്യാപക പരാതിയുണ്ട്. പകൽ മുഴുവൻ ജോലി ചെയ്ത് ക്ഷീണിച്ച് എത്തുന്നവർക്ക് ഇടയ്ക്കിടെ കരണ്ട് പോകുന്നതിനാൽ, ഉറങ്ങാനാവാത്ത സ്ഥിതിയാണ് പലയിടത്തും.