പുതുപ്പള്ളി പെരുന്നാൾ കൊടിയേറ്റ് ഇന്ന്

പുതുപ്പള്ളി പെരുന്നാൾ കൊടിയേറ്റ് ഇന്ന്.

കോട്ടയം: പുതുപ്പള്ളി പൗരസ്‌ത്യ ജോർജിയൻ തീർത്ഥാടനകേന്ദ്രമായ സെൻ്റ് ജോർജ് ഓർത്തഡോക്സ് വലിയ പള്ളിയിൽ വിശുദ്ധ ഗീവറുഗീസ് സഹദായുടെ പെരുന്നാളിന് ഇന്നു കൊടിയേറും. പുതുപ്പള്ളി, എറികാട് കരകളിൽ നിന്നു കൊടിമര ഘോഷയാത്ര  ഉച്ചയ്ക്ക് 2ന് ആരംഭിക്കും. വൈകുന്നേരം അഞ്ചിന് വികാരി ഫാ. ഡോ. വർഗീസ് വർഗീസ് കൊടിയേറ്റ് നിർവഹിക്കും. 

          മേയ് ഒന്നു മുതൽ നാലു വരെ പുതുപ്പള്ളി കൺവൻഷൻ നടക്കും. ദിവസവും വൈകിട്ട് 6.15ന് ആണ് കൺവൻഷൻ. 4-ാം തീയതി രാവിലെ 9ന് വെച്ചൂട്ടിനുള്ള മാങ്ങ അരിയൽ നടക്കും. അഞ്ചിന് രാവിലെ 11.30നു മന്ത്രി വി.എൻ. വാസവൻ സംസ്ക്‌കാരിക സമ്മേളനം ഉദ്ഘാടനം ചെയ്യും. അവയവദാനത്തിലൂടെ മാതൃകയായ ഫാ. കുര്യാക്കോസ് വർഗീസ്, ഫാ. നോബിൻ ഫിലിപ്പ് എന്നിവർക്ക് ഓർഡർ ഓഫ് സെൻ്റ് ജോർജ് പുരസ്‌കാരം സമ്മാനിക്കും.

       ആറിന് രാവിലെ 11നു ചരിത്രപ്രസിദ്ധമായ പൊന്നിൻകുരിശ് വിശുദ്ധ മദ്ബഹയിൽ പ്രതിഷ്ഠിക്കും. ഉച്ചയ്ക്ക് രണ്ടിനു വിറകിടീൽ ഘോഷയാത്ര, 4.30നു പന്തിരുനാഴി പുറത്തെടുക്കൽ, 5.15നു പെരുന്നാൾ സന്ധ്യാനമസ്കാരം, 6.30നു പ്രദക്ഷിണം എന്നിവ നടക്കും. പ്രദക്ഷിണം നിലയ്ക്കൽ പള്ളി, പുതുപ്പള്ളി കവലയിലുള്ള കുരിശടി ചുറ്റി പള്ളിയിലേക്ക് എത്തിച്ചേരും. രാത്രി ഒന്നിനു വെച്ചൂട്ടിനുള്ള അരിയിടീൽ നടക്കും.

        വലിയ പെരുന്നാൾ ദിനമായ 7-ാം തീയതി പുലർച്ചെ 5നു കുർബാന, 8.30ന് ഒൻപതിൻമേൽ കുർബാന പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ നിർവ്വഹിക്കും. 11.15നു വെച്ചൂട്ട് നേർച്ചസദ്യ, വടക്കേ പന്തലിൽ കുട്ടികൾക്കുള്ള ആദ്യ ചോറൂട്ട്, ഉച്ചയ്ക്ക് 2നു പെരുന്നാൾ പ്രദക്ഷിണം എന്നിവയും നടക്കും. അങ്ങാടി, ഇരവിനല്ലൂർ കവല ചുറ്റിയെത്തും.തുടർന്ന്  4നു നേർച്ചവിളമ്പ് നടക്കും. മേയ് 23നു രാവിലെ 7.15നു പെരുന്നാളിനു കൊടിയിറങ്ങും.