ബാർ കോഴയിൽ ജുഡീഷ്യൽ അന്വേഷണം വേണം; സമരത്തിന് യുഡിഎഫ്, 12ന് നിയമസഭാ മാർച്ച്.

ബാർ കോഴയിൽ ജുഡീഷ്യൽ അന്വേഷണം വേണം; സമരത്തിന് യുഡിഎഫ്, 12ന് നിയമസഭാ മാർച്ച്.

തിരു.: ബാർ കോഴയിൽ സമരത്തിനൊരുങ്ങി യുഡിഎഫ്. ജൂൺ 12ന് യുഡിഎഫ് നിയമസഭാ മാർച്ച് നടത്തും. ബാർ കോഴയിൽ ജുഡീഷ്യൽ അന്വേഷണം വേണമെന്നാണ് യുഡിഎഫ് ആദ്യം മുതൽ ആവശ്യപ്പെടുന്നത്. നിയമസഭയ്ക്ക് അകത്തും പുറത്തും ശക്തമായ നിലപാട് സ്വീകരിക്കുമെന്നും യുഡിഎഫ് നേതാക്കൾ പറഞ്ഞു.

      ബാർ കോഴ ആരോപണത്തിൽ ക്രൈം ബ്രാഞ്ചിന് നിഷ്പക്ഷ അന്വേഷണം പറ്റില്ലെന്ന് യുഡിഎഫ് കൺവീനർ എം.എം. ഹസ്സൻ ആവർത്തിച്ചു. മുഖ്യമന്ത്രിയുടെ അറിവില്ലാതെ ബാറുടമകൾക്ക് ഉറപ്പ് നൽകാൻ ആർക്കും കഴിയില്ല. പണപ്പിരിവിൻ്റെ ഗുണഫലം സിപിഐഎമ്മിനാണെന്നും എം.എം. ഹസ്സൻ പറഞ്ഞു.

      വിദേശത്തു നിന്ന് സ്വ‌ർണ്ണം കടത്തിയതിന് ശശി തരൂരിന്റെ സ്റ്റാഫ്‌ അറസ്റ്റിലായ സംഭവത്തിൽ ശശി തരൂർ ആ വാർത്ത കേട്ട് ഞെട്ടുകയായിരുന്നു എന്നാണ് എം.എം. ഹസ്സന്റെ പ്രതികരണം. പിഎ സ്ഥാനത്തു നിന്ന് അയാളെ മാറ്റിയതാണ്. തരൂരിന് ഇതുമായി ബന്ധമില്ല. കേരളത്തിലെ സ്വർണ്ണക്കടത്ത് വേറെ കാര്യമാണ്. തരൂരിനെയും മുഖ്യമന്ത്രിയെയും യോജിപ്പിച്ച് പറയാൻ പാടില്ല. സ്വർണ്ണക്കടത്ത് മുഖ്യമന്ത്രിയുടെ ഓഫീസ് കേന്ദ്രീകരിച്ചാണെന്നും ഹസ്സൻ ആരോപിച്ചു.