മഴക്കുഴിയിൽ വീണ് രണ്ടര വയസ്സുകാരി മരിച്ചു.

മഴക്കുഴിയിൽ വീണ് രണ്ടര വയസ്സുകാരി മരിച്ചു.

തിരു.: കിളിമാനൂരിൽ മഴക്കുഴിയിൽ വീണ് രണ്ടര വയസ്സുകാരി മരിച്ചു. അടയമൺ വയ്യാറ്റിൻകര വെള്ളാരംകുന്ന് വീട്ടിൽ രാജീവ്, വർഷ ദമ്പതികളുടെ മകൾ രൂപ രാജീവ് ആണ് മരിച്ചത്.

      തിങ്കളാഴ്ച വൈകുന്നേരം അഞ്ച് മണിയോടു കൂടിയാണ് അപകടം. കഴിഞ്ഞ ദിവസം നിർത്താതെയുള്ള മഴയിൽ മഴക്കുഴി വെള്ളം കൊണ്ട് നിറഞ്ഞിരുന്നു. അപകടം നടന്ന ഉടൻ കടയ്ക്കൽ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

          വീടിനു സമീപമുള്ള രണ്ടരയടി താഴ്ചയുള്ള മഴക്കുഴിയിലാണ് കുഞ്ഞ് വീണത്. വീടിന് പുറകുവശത്ത് സഹോദരനൊപ്പം കളിച്ചു കൊണ്ടിരിക്കുകയായിരുന്നു കുട്ടി. ഇതിനിടയിൽ രൂപയെ കാണാതാവുകയായിരുന്നു. തുടർന്ന് മൂത്ത കുട്ടി അമ്മയെ വിവരം അറിയിക്കുകയും ഇവർ നടത്തിയ തിരച്ചിലിൽ മഴക്കുഴിയിൽ വീണു കിടക്കുന്ന കുട്ടിയെ കണ്ടെത്തുകയുമായിരുന്നു.

         മൃതദേഹം മോർച്ചറിയിലേയ്ക്ക് മാറ്റി. കിളിമാനൂർ പൊലീസ് മേൽനടപടികൾ സ്വീകരിച്ചു. സഹോദരൻ: ജീവ രാജീവ്‌ (അങ്കണവാടി വിദ്യാർത്ഥി).