ഡോ. കെ.എം. ചെറിയാൻ അന്തരിച്ചു.
ബംഗളൂരു: പ്രശസ്‌ത ഹൃദയ ശസ്ത്രക്രിയാ വിദഗ്‌ധൻ ഡോ. കെ.എം. ചെറിയാൻ (82) അന്തരിച്ചു. ശനിയാഴ്‌ച രാത്രി 11.50ന് മണിപ്പാൽ ആശുപത്രിയിൽ ആയിരുന്നു അന്ത്യം. സ്വകാര്യ പരിപാടിക്കായി ബെംഗളൂരുവിൽ എത്തിയപ്പോൾ ആയിരുന്നു മരണം.
രാജ്യത്തെ ആദ്യത്തെ കൊറോണി ആർട്ടറി ബൈപ്പാസ് ശസ്ത്രക്രിയ നടത്തിയ ഡോക്ടറാണ് ചെറിയാൻ. ആദ്യത്തെ പീഡിയാട്രിക് ട്രാൻസ്‌പ്ലാൻ്റ്, ആദ്യത്തെ ടിഎംആർ (ലേസർ ഹാർട്ട് സർജറി) എന്നിവ നടത്തിയ അദ്ദേഹത്തെ 1991ൽ രാജ്യം ആദരിച്ചു.
ഇന്നലെ സുഹൃത്തിന്റെ മകന്റെ വിവാഹ ചടങ്ങില്‍ പങ്കെടുക്കാന്‍ ബെംഗളൂരുവില്‍ എത്തിയതായിരുന്നു അദ്ദേഹം. രാത്രിയോടെ ശരീരിക അസ്വസ്ഥത അനുഭവപ്പെട്ടതിനെ തുടര്‍ന്ന് ആശുപത്രിയില്‍ പ്രവേശിപ്പിക്കുകയായിരുന്നു.
വെല്ലൂരിലെ ക്രിസ്ത്യൻ മെഡിക്കൽ കോളേജ് ആശുപത്രിയിൽ സർജറിയിൽ ലക്ചററായി ആണ് ഡോ. കെ.എം. ചെറിയാൻ തന്റെ കരിയർ ആരംഭിച്ചത്. 1973ൽ ഓസ്ട്രേലിയയിൽ നിന്ന് കാർഡിയോതൊറാസിക് സർജറിയിൽ അദ്ദേഹം എഫ്ആർഎസിഎസ് നേടി. ന്യൂസിലൻഡിൽ ജോലി ചെയ്ത അദ്ദേഹം അമേരിക്കയിലേക്ക് കുടിയേറി. അലബാമയിലെ ബർമിംഗ്ഹാമിൽ ഡോ. ജോൺ ഡബ്ല്യു. കിർക്ക്ലിന്റെ കീഴിൽ പീഡിയാട്രിക് കാർഡിയാക് സർജറിയിലും ഒറിഗോൺ സർവകലാശാലയിൽ ഡോ. ആൽബർട്ട് സ്റ്റാറിന്റെ കീഴിൽ പീഡിയാട്രിക് കാർഡിയാക് സർജറിയിൽ സ്പെഷ്യൽ ഫെലോ ആയി അദ്ദേഹം ജോലി ചെയ്തു. ചൈനയിലെ യാങ്ഷൗ സർവകലാശാലയിൽ പ്രൊഫസറായിരുന്നു.
1975ൽ ഇന്ത്യയിലെ ആദ്യത്തെ വിജയകരമായ കൊറോണറി ആർട്ടറി ബൈപാസ് സർജറി അദ്ദേഹം നടത്തി. മസ്തിഷ്ക മരണം നിയമവിധേയം ആക്കിയതിനു ശേഷം രാജ്യത്തെ ആദ്യത്തെ ഹൃദയം മാറ്റിവയ്ക്കലും അദ്ദേഹം നടത്തി. ആദ്യത്തെ ഹൃദയ-ശ്വാസകോശ മാറ്റിവയ്ക്കൽ, ആദ്യത്തെ പീഡിയാട്രിക് ട്രാൻസ്പ്ലാൻറ്, ആദ്യത്തെ ടിഎംആർ (ലേസർ ഹാർട്ട് സർജറി) എന്നിവയും അദ്ദേഹം നിർവഹിച്ചു. ലഖ്‌നൗവിലെ കിംഗ് ജോർജ്ജ് മെഡിക്കൽ യൂണിവേഴ്‌സിറ്റി നൽകുന്ന ഡോക്ടർ ഓഫ് സയൻസ് (ഹോണറിസ് കോസ) ബിരുദം നേടിയ വ്യക്തിയാണ്. 1991ൽ ഇന്ത്യാ ഗവൺമെന്റ് അദ്ദേഹത്തിന് പത്മശ്രീ നൽകി ആദരിച്ചു. 1990 മുതൽ 1993 വരെ ഇന്ത്യൻ പ്രസിഡന്റിന്റെ ഓണററി സർജനായിരുന്നു. 2005ൽ ഹാർവാർഡ് മെഡിക്കൽ സ്കൂൾ സംഘടിപ്പിച്ച ഒരു പാനലിലൂടെ അദ്ദേഹത്തിന് വോക്കാർഡ് മെഡിക്കൽ എക്സലൻസ് അവാർഡ് ലഭിച്ചു. ഗ്രീസിലെ കെ.ഒ.എസ്. ദ്വീപിൽ വേൾഡ് സൊസൈറ്റി ഓഫ് കാർഡിയോ തൊറാസിക് സർജൻസ് (ഡബ്ല്യു.എസ്.സി.ടി.എസ്.) അടുത്തിടെ നടത്തിയ വേൾഡ് കോൺഗ്രസിൽ തന്റെ പേര് കല്ലിൽ ആലേഖനം ചെയ്തതിനുള്ള അതുല്യ ബഹുമതിക്ക് ഇന്ത്യയിൽ നിന്ന് തിരഞ്ഞെടുക്കപ്പെട്ട ഏകവ്യക്തിയാണ് ഡോ. ചെറിയാൻ.
വേൾഡ് കോൺഗ്രസ് ഓഫ് തൊറാസിക് കാർഡിയാക് സർജന്റെ പ്രസിഡന്റായ ആദ്യ ഇന്ത്യക്കാരനും ഇന്ത്യയിൽ നിന്നുള്ള അമേരിക്കൻ അസോസിയേഷൻ ഓഫ് തൊറാസിക് സർജറിയുടെ ആദ്യ അംഗവുമാണ് അദ്ദേഹം. മദ്രാസ് മെഡിക്കൽ മിഷന്റെ (എംഎംഎം) സ്ഥാപക വൈസ് പ്രസിഡന്റും ഡയറക്ടറും പോണ്ടിച്ചേരി ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിന്റെ (പിംസ്) സ്ഥാപക ചെയർമാനുമായിരുന്നു. ഇന്ത്യയിലെ ആദ്യത്തെ മെഡിക്കൽ സെസും മെഡിക്കൽ സയൻസ് പാർക്കുമായ ഫ്രോണ്ടിയർ ലൈഫ്‌ലൈൻ ഹോസ്പിറ്റലിന്റെയും ഫ്രോണ്ടിയർ മെഡിവില്ലെയുടെയും സ്ഥാപക ചെയർമാനാണ്.
അദ്ദേഹത്തിന്റെ ചാരിറ്റബിൾ ട്രസ്റ്റ് കേരളത്തിലെ പരുമലയിൽ സെന്റ് ഗ്രിഗോറിയോസ് കാർഡിയോ വാസ്കുലർ സെന്റർ നിർമ്മിച്ചു. കല്ലിശ്ശേരിയിൽ കെ.എം. ചെറിയാൻ ആശുപത്രിയും പ്രവർത്തിക്കുന്നുണ്ട്. അദ്ദേഹത്തിന്റെ വിദ്യാഭ്യാസ ട്രസ്റ്റ് പുതുച്ചേരിയിൽ "ദി സ്റ്റഡി - എൽ'കോൾ ഇന്റർനാഷണൽ" എന്ന പേരിൽ ഇന്റർനാഷണൽ സിബിഎസ്ഇ സ്കൂൾ നടത്തുന്നു.
0 Comments