ഓണത്തോടനുബന്ധിച്ച പൂജകൾക്കായി ശബരിമല നട തുറന്നു.

ഓണത്തോടനുബന്ധിച്ച പൂജകൾക്കായി ശബരിമല  നട തുറന്നു.

ശബരിമല: ഓണത്തോടനുബന്ധിച്ച പൂജകൾക്കായി ശബരിമല നട തുറന്നു. ഇന്നലെ വൈകുന്നേരം അഞ്ചുമണിക്ക് തന്ത്രി കണ്ഠരര് മഹേഷ് മോഹനരുടെ സാന്നിധ്യത്തിൽ മേൽശാന്തി എസ്. അരുൺകുമാർ നമ്പൂതിരി നട തുറന്ന്  ശ്രീ കോവിലിൽ ദീപം തെളിയിച്ചു. ശേഷം പതിനെട്ടാംപടിയ്ക്ക് താഴെ ആഴിയിൽ അഗ്നി പകർന്നു. നൂറുകണക്കിന് ഭക്തരാണ്  ഭസ്മാഭിഷിക്തനായ ഭഗവാനെ തൊഴാൻ കാത്തുനിന്നിരുന്നത്. 

        ഉത്രാട ദിനമായ ഇന്ന് രാവിലെ 5 മണിക്ക് ദർശനത്തിനായി നട തുറന്നു. ഓണത്തോടനുബന്ധിച്ച് ഉത്രാടം, തിരുവോണം, അവിട്ടം നാളുകളിൽ സന്നിധാനത്ത് അയ്യപ്പഭക്തർക്ക് ഓണസദ്യ ഉണ്ടാകും. മേൽശാന്തിയുടെ വകയാണ് ഉത്രാടസദ്യ. തിരുവോണനാളിൽ ദേവസ്വം ജീവനക്കാരാണ് സദ്യ നടത്തുന്നത്. അവിട്ടം നാളിൽ സന്നിധാനത്ത് ഡ്യൂട്ടി നോക്കുന്ന പോലീസ് ഉദ്യോഗസ്ഥരുടെ വകയാണ് സദ്യ. 

         ഓണത്തോടനുബന്ധിച്ച പൂജകൾ പൂർത്തിയാക്കി ചതയ ദിനത്തിൽ (07.09.2025) ശബരിമല നടയടക്കും. അന്ന് രാത്രി 9.50 മുതൽ ചന്ദ്രഗ്രഹണം ആരംഭിക്കുന്നതിനാൽ, രാത്രി 8.50നു ഹരിവരാസനം പാടി 9 മണിയോടെയാകും നടയടയ്ക്കുക.