തൃശൂർ അതിരൂപത മുൻ മെത്രാൻ മാർ ജേക്കബ് തൂങ്കുഴി കാലം ചെയ്തു.

തൃശൂർ അതിരൂപത മുൻ മെത്രാൻ മാർ ജേക്കബ് തൂങ്കുഴി കാലം ചെയ്തു.

തൃശൂർ: തൃശൂർ അതിരൂപത മുൻ മെത്രാൻ മാർ ജേക്കബ് തൂങ്കുഴി കാലം ചെയ്തു. 94 വയസായിരുന്നു. ഇന്ന് ഉച്ച കഴിഞ്ഞ് 2.50നായിരുന്നു അന്ത്യം.

         പാലാ വിളക്കുമാടം തൂങ്കുഴിയിൽ കുരിയപ്പൻ, റോസ ദമ്പതികളുടെ മകനായി 1930 ഡിസംബർ 13നായിരുന്നു മാർ തൂങ്കുഴിയുടെ ജനനം. ചങ്ങനാശ്ശേരി രൂപതയ്ക്കു വേണ്ടി സെമിനാരിയിൽ ചേർന്ന അദ്ദേഹം, പിന്നീട് തലശ്ശേരി രൂപതയ്ക്കു വേണ്ടി പുരോഹിതനായി. സഭാനിയമത്തിലും സിവിൽ നിയമത്തിലും ഡോക്‌ടറേറ്റ്‌ നേടിയ അദ്ദേഹം, തലശ്ശേരി രൂപതയുടെ പ്രഥമ മെത്രാൻ മാർ സെബാസ്റ്റ്യൻ വള്ളോപ്പിള്ളിയുടെ സെക്രട്ടറി, തലശ്ശേരി രൂപതയുടെ ചാൻസലർ, മൈനർ സെമിനാരി റെക്‌ടർ എന്നീ നിലകളിൽ സേവനം ചെയ്തു.

         1973ൽ മാനന്തവാടി രൂപതയുടെ പ്രഥമ മെത്രാനായി. 1995ൽ താമരശ്ശേരി രൂപതാദ്ധ്യക്ഷനായി. 1996 ഡിസംബർ 18ന് തൃശൂർ ആർച്ച് ബിഷപ്പായി നിയമിതനായി. 2007ൽ തൽസ്ഥാനത്തു നിന്ന് വിരമിച്ചു. തൃശൂർ അതിരൂപതയുടെ മഡോണ മൈനർ സെമിനാരിയിൽ വിശ്രമജീവിതം നയിച്ചുവരവേയാണ് അന്ത്യം. സിസ്റ്റേഴ്സ് ഓഫ് ക്രിസ്തുദാസി സന്യാസിനി സമൂഹത്തിന്റെയും സിസ്റ്റേഴ്സ് ഓഫ് സെന്റ് ജോസഫ് ദ വർക്കറിൻ്റെയും സ്ഥാപകനാണ്.