സ്വർണ്ണപ്പാളി വിവാദം: സമഗ്രമായ അന്വേഷണം ഉണ്ടാകണമെന്ന് പന്തളം കൊട്ടാരം.

സ്വർണ്ണപ്പാളി വിവാദം: സമഗ്രമായ അന്വേഷണം ഉണ്ടാകണമെന്ന് പന്തളം കൊട്ടാരം.

പന്തളം: ശബരിമലയിൽ ദ്വാരപാലക വിഗ്രഹത്തിൽ 1998ൽ വിജയ് മല്യ വഴിപാടായി സമർപ്പിച്ച സ്വർണ്ണപ്പാളികൾ 2019ൽ സ്വർണ്ണം അല്ലാണ്ടായത് എങ്ങനെയാണെന്ന് സമഗ്രമായ ഒരു അന്വേഷണം ഉണ്ടാകണമെന്ന് പന്തളം കൊട്ടാരം. അതുപോലെ തന്നെ സ്പോൺസർമാരായി വരുന്നവർക്ക് ആ പ്രവൃത്തി ചെയ്യുവാനുള്ള കഴിവും സാമ്പത്തികവും ഉണ്ടോ എന്ന് അന്വേഷിക്കേണ്ടതും വളരെ അത്യാവശ്യമാണ്. ഇതുപോലെ ഉള്ള പ്രധാനപ്പെട്ട ജോലികൾ ചെയ്യുന്നതിനു പാലിക്കേണ്ട നടപടിക്രമങ്ങൾ ഒന്നും തന്നെ 2019ൽ ഉണ്ടായില്ല എന്നുള്ളത് ഭക്തജനങ്ങളെ വിഷമിപ്പിക്കുന്നതും പേടിപ്പെടുത്തുന്നതുമാണ്. അന്നത്തെ നടപടിക്രമങ്ങൾ വളരെ ലാഘവത്തോടെ കൈകാര്യം ചെയ്ത, അതിൻ്റെ ഉത്തരവാദപ്പെട്ട ഉദ്യോഗസ്ഥർ ആരായാലും അത് കണ്ടെത്തുകയും ഇതിനു പിന്നിൽ ആരൊക്കെ ഉണ്ടായിരുന്നുവോ അവരെ എല്ലാം കണ്ടു പിടിച്ച് ഭക്തജനങ്ങൾക്കുള്ള ആശങ്ക പരിഹരിക്കേണ്ട ഉത്തരവാദിത്വം ഈ സർക്കാരിനുണ്ട്. മറ്റൊന്ന് 2019ൽ മദ്രാസിലെ കമ്പനിയിൽ എത്തിച്ച പാളികൾ ആ കമ്പനി സ്വർണ്ണം "പൂശി" തിരികെ കൊണ്ടുവന്നതിനു ശേഷം 6 വർഷം കഴിഞ്ഞപ്പോൾ അത് വീണ്ടും കറത്തുപോയി, നിറം മങ്ങി എന്നു പറയുമ്പോൾ 2019ൽ ആ കമ്പനി എത്ര കനത്തിൽ ആണ് (എത്ര മൈക്രോൺ) അന്ന് സ്വർണ്ണം പൂശിയത് എന്നു കൂടി പരിശോധിക്കണം, അവർ അത് പറയണം. ഇന്ന് പ്രതി പട്ടികയിൽ നിക്കുന്ന ഉണ്ണികൃഷ്ണൻ പോറ്റിയെ വിശദമായി ചോദ്യം ചെയ്താൽ ഇതിൻ്റെ എല്ലാം സത്യാവസ്ഥ അറിയാൻ സാധിക്കും. അതല്ല എന്നുണ്ടെങ്കിൽ 2019നു മുമ്പ് ഇത് നഷ്ടപ്പെട്ടിട്ടുണ്ടോ എന്നും പരിശോധിക്കണമെന്നും പന്തളം കൊട്ടാരം നിർവ്വാഹക സംഘം സെക്രട്ടറി എം.ആർ. സുരേഷ് വർമ്മ പറഞ്ഞു.