റെയിൽവേ ലൈനിൽ അറ്റകുറ്റപ്പണി: ചില ട്രെയിനുകള്‍ വഴി തിരിച്ചു വിടും, മെമു റദ്ദാക്കി.

റെയിൽവേ ലൈനിൽ അറ്റകുറ്റപ്പണി: ചില ട്രെയിനുകള്‍ വഴി തിരിച്ചു വിടും, മെമു റദ്ദാക്കി.

കോട്ടയം: കോട്ടയത്തിനും ചിങ്ങവനത്തിനും ഇടയില്‍ റെയിൽവേ ലൈനിൽ അറ്റകുറ്റപ്പണികൾ നടക്കുന്നതിനാല്‍ ട്രെയിന്‍ ഗതാഗതത്തില്‍ നിയന്ത്രണം ഏർപ്പെടുത്തി. ഒക്ടോബര്‍ 11, 12 തീയതികളിലാണ് നിയന്ത്രണം. അറ്റകുറ്റപ്പണി കാരണം ചില ട്രെയിനുകള്‍ വഴി തിരിച്ചു വിടുമെന്നും ചിലത് ഭാഗികമായി റദ്ദാക്കിയതായും ദക്ഷിണ റെയില്‍വേ അറിയിച്ചു.

       ഒക്ടോബര്‍ 11 ശനിയാഴ്ച 16319 തിരുവനന്തപുരം നോര്‍ത്ത്- എസ്എംവിടി ബെംഗളൂരു ഹംസഫര്‍ എക്‌സ്പ്രസ്, 22503 കന്യാകുമാരി- ദിബ്രുഗഢ് വിവേക് എക്‌സ്പ്രസ് എന്നിവ ആലപ്പുഴ വഴി തിരിച്ചു വിടും. ആലപ്പുഴ, എറണാകുളം ജങ്ഷന്‍ എന്നിവിടങ്ങളില്‍ അധികമായി സ്റ്റോപ്പുണ്ടാകും. 16343 തിരുവനന്തപുരം സെന്‍ട്രല്‍- മധുര അമൃത എക്‌സ്പ്രസ്, 16347 തിരുവനന്തപുരം സെന്‍ട്രല്‍- മംഗളൂരു സെന്‍ട്രല്‍ എക്‌സ്പ്രസ് എന്നിവയും ആലപ്പുഴ വഴിയാകും ഓടുക. രണ്ടു ട്രെയിനുകൾക്കും ഹരിപ്പാട്, അമ്പലപ്പുഴ, ആലപ്പുഴ, ചേര്‍ത്തല, എറണാകുളം ജങ്ഷന്‍ എന്നീ സ്റ്റേഷനുകളില്‍ സ്‌റ്റോപ്പുണ്ടാകും

         ഒക്ടോബര്‍ 11ലെ 16327 മധുര-ഗുരൂവായൂര്‍ എക്സ്പ്രസ് കൊല്ലത്തിനും ഗുരുവായൂരിനും ഇടയില്‍ റദ്ദാക്കി. ട്രെയിന്‍ കൊല്ലത്ത് സര്‍വീസ് അവസാനിപ്പിക്കും. ഒക്ടോബര്‍ 12ലെ 16328 ഗുരുവായൂര്‍ -മധുര എക്സ്പ്രസ് ഗുരുവായൂരിനും കൊല്ലത്തിനും ഇടയില്‍ റദ്ദാക്കി. ഉച്ചയ്ക്ക് 12.10ന് കൊല്ലത്തു നിന്നായിരിക്കും ട്രെയിന്‍ സര്‍വീസ് ആരംഭിക്കുക. ഒക്ടോബര്‍ 11ലെ 16326 കോട്ടയം- നിലമ്പൂര്‍ എക്സ്പ്രസ് ഏറ്റുമാനൂരിൽ യാത്ര അവസാനിപ്പിക്കും. ഈ ട്രെയിന്‍ തിരികെ ഏറ്റൂമാനൂര്‍ സ്റ്റേഷനില്‍ നിന്ന് ഞായറാഴ്ച രാവിലെ 05.27ന് പുറപ്പെടും. ശനിയാഴ്ച രാത്രി 9.05ന് പുറപ്പെടേണ്ട കൊല്ലം - എറണാകുളം മെമു എക്‌സ്‌പ്രസ്‌ (ട്രെയിൻ നമ്പർ 66310) റദ്ദാക്കി.