വിവാദ പെട്രോള്‍ പമ്പ് അപേക്ഷൻ ടി.വി. പ്രശാന്തിന് സസ്പെൻഷൻ.
കണ്ണൂർ: ഗുരുതരമായ അച്ചടക്ക ലംഘനവും പെരുമാറ്റച്ചട്ടലംഘനവും നടത്തിയെന്ന് കണ്ടെത്തിയതിനെ തുടർന്ന് വിവാദ പെട്രോള്‍ പമ്പ് അപേക്ഷൻ ടി.വി. പ്രശാന്തിന് സസ്പെൻഷൻ. പരിയാരം മെഡിക്കല്‍ കോളജ് ജീവനക്കാരനായ പ്രശാന്തിനെതിരെ ആരോഗ്യ വകുപ്പമാണ് നടപടിയെടുത്തത്. സർക്കാർ സർവീസിലിരിക്കെ പെട്രോള്‍ പമ്പിന് അപേക്ഷിച്ചതും കൈക്കൂലി നല്‍കിയെന്നു പറഞ്ഞതും സർവീസ് ചട്ടലംഘനമെന്ന് സസ്പെൻഷൻ ഉത്തരവില്‍ ചൂണ്ടിക്കാണിക്കുന്നു. കൈക്കൂലി നല്‍കുന്നതും വാങ്ങുന്നതും ഗുരുതരമായ ചട്ടലംഘനമാണ്. കടുത്ത അച്ചടക്ക നടപടിക്ക് മുന്നോടിയായാണ് സസ്പെൻഷൻ. നിലവിൽ ഇലക്ട്രീഷ്യൻ ആയി ജോലി ചെയ്യുയുകയായിരുന്നു പ്രശാന്ത്. കൂടുതല്‍ അന്വേഷണത്തിനും അച്ചടക്ക നടപടി ആരംഭിക്കുന്നതിനുമായി സേവനത്തില്‍ നിന്ന് ഉടൻ സസ്‌പെൻഡ് ചെയ്യുന്നുവെന്നാണ് ഉത്തരവില്‍ പറയുന്നത്. ഇയാള്‍ പത്തു ദിവസത്തെ കൂടി അവധിക്ക് അപേക്ഷിച്ചിരുന്നു. ഇതിനിടയിലാണ് സസ്പെൻഷൻ ഉത്തരവ് വന്നിരിക്കുന്നത്.
കണ്ണൂർ എഡിഎമ്മിന്റെ മരണത്തെ തുടർന്ന് ആരോഗ്യ വകുപ്പിനെതിരെ രൂക്ഷമായ വിമർശനങ്ങള്‍ ഉയർന്നിരുന്നു. സർക്കാർ സർവീസിലിരിക്കുന്ന പ്രശാന്തിന് എങ്ങനെയാണ് പെട്രോള്‍ പമ്പിന് അപേക്ഷ നല്‍കാൻ സാധിക്കുക, പ്രശാന്തിന് എതിരെ നടപടിയെടുക്കാത്തത് എന്തുകൊണ്ട് തുടങ്ങിയ ചോദ്യങ്ങള്‍ ആരോഗ്യമന്ത്രി വീണാ ജോർജും അഭിമുഖീകരിച്ചിരുന്നു. ഇതിനു പിന്നാലെയാണ് പ്രശാന്തിനെതിരെ അന്വേഷണം നടത്തുന്നതും ചട്ടലംഘനം നടത്തിയെന്ന് കണ്ടെത്തിയതിനെ തുടർന്ന് നടപടിയെടുക്കുന്നതും.
0 Comments