പത്തനംതിട്ട: സ്വകാര്യ ബസ്സ്‌ ശരീരത്തിലൂടെ കയറിയിറങ്ങി സ്കൂട്ടർ യാത്രക്കാരിയായ യുവതി മരിച്ചു. ചിറ്റാര്‍ കാരികയം പള്ളിപ്പറമ്പില്‍ രാജൻ, രമ ദമ്പതികളുടെ ഏക മകള്‍ അശ്വതി രാജന്‍ (29) ആണ് മരിച്ചത്. ഇന്ന് വൈകിട്ട് വടശേരിക്കര പൊതുമരാമത്ത് റോഡില്‍ മണിയാര്‍ അരീക്കകാവ് കോണ്‍ക്രീറ്റ് മിക്‌സിങ് പ്ലാന്റിന് സമീപമായിരുന്നു അപകടം.
വടശേരിക്കരയിലെ സ്വകാര്യ ക്ലീനിക്കിലെ നഴ്സ് ആയിരുന്നു. ചിറ്റാര്‍-വയ്യാറ്റുപുഴ റൂട്ടില്‍ സര്‍വീസ് നടത്തുന്ന ആവേമരിയ ബസാണ് യുവതിയുടെ ശരീരത്തിലൂടെ കയറിയിറങ്ങിയത്. റോഡിന്റെ ഒരു വശം കാന നിര്‍മ്മാണത്തിനായി കുഴിയെടുത്ത് ഇട്ടിരിക്കുന്നതാണ് അപകടത്തിലേക്ക് നയിച്ചത്. ഇവിടെ കാന നിര്‍മ്മാണവുമായി ബന്ധപ്പെട്ട് ടാര്‍വീപ്പ റോഡരികിൽ വെച്ചിരുന്നു. ബസ് വരുന്നതു കണ്ട് സൈഡ് കൊടുക്കുന്നതിനായി റോഡരികിലേക്ക് സ്‌കൂട്ടര്‍ മാറ്റുന്നതിനിടയില്‍ ടാര്‍ വീപ്പയില്‍ തട്ടി യുവതി റോഡിലേക്ക് വീഴുകയായിരുന്നു. ഇതിനിടയില്‍ പിന്നാലെ വന്ന ബസ് കയറിയിറങ്ങുകയും ചെയ്തു. പെരുനാട് പൊലീസ് മേല്‍നടപടികള്‍ സ്വീകരിച്ചു. മൃതദേഹം ആശുപത്രി മോര്‍ച്ചറിയിലേയ്ക്ക് മാറ്റി.
0 Comments