വ്യാജപ്രചരണത്തിലൂടെ ഭിന്നത സൃഷ്ടിക്കരുത്: കാഞ്ഞിരപ്പള്ളി രൂപത.

വ്യാജപ്രചരണത്തിലൂടെ ഭിന്നത സൃഷ്ടിക്കരുത്: കാഞ്ഞിരപ്പള്ളി രൂപത.

കോട്ടയം: വ്യാജപ്രചരണത്തിലൂടെ ഭിന്നത സൃഷ്ടിക്കരുതെന്ന് കാഞ്ഞിരപ്പള്ളി രൂപത. കാഞ്ഞിരപ്പള്ളി രൂപത കുരിശിൻ്റെ വഴി നിരോധിച്ചു എന്ന വ്യാജ പ്രചരണത്തിലൂടെ രൂപതാ അദ്ധ്യക്ഷനെതിരെ അധിക്ഷേപകരമായ പരാമർശങ്ങൾ ചില ഓൺലൈൻ മാധ്യമങ്ങൾ നടത്തുന്നുവെന്ന് കാഞ്ഞിരപ്പള്ളി രൂപത പിആർഒ ഫാ. സ്റ്റാൻലി പുള്ളോലിക്കൽ പറഞ്ഞു.

      വിശുദ്ധവാരത്തോടനുബന്ധിച്ച് രൂപതാദ്ധ്യക്ഷൻ്റെ നിർദ്ദേശമനുസരിച്ച് രൂപത പ്രോട്ടോസിഞ്ചെല്ലൂസ് വൈദികർക്കായി നല്കിയ ഓർമ്മപ്പെടുത്തലുകളെയാണ് ദുർവ്യാഖ്യാനം ചെയ്‌ത്‌ തെറ്റിദ്ധരിപ്പിക്കുവാൻ ശ്രമിക്കുന്നത്.

         വലിയനോമ്പ് കാലത്ത്, പ്രത്യേകിച്ച് വെള്ളിയാഴ്ചകളിൽ പൊതുവായി കുരിശിൻ്റെ വഴി നടത്തുന്ന പതിവ് രൂപതയിലെ എല്ലാ പള്ളികളിലും നിലനില്ക്കുന്നുണ്ട്. കുരിശിന്റെ വഴിയുൾപ്പെടെയുള്ള വിശുദ്ധവാര കർമ്മങ്ങൾ അർത്ഥവത്തും പ്രാർത്ഥനാ പൂർവ്വകവുമായി നടത്തുന്നതിനു വേണ്ടി അവയുടെ ചൈതന്യത്തിന് വിഘാതമാകുന്ന നാടകീയ ആവിഷ്കാരങ്ങൾ ഒഴിവാക്കണമെന്ന നിർദ്ദേശമാണ് നല്കപ്പെട്ടതെന്ന് ഫാ. സ്റ്റാൻലി പുള്ളോലിക്കൽ അറിയിച്ചു.

        അടിസ്ഥാനരഹിതമായ പ്രചരണങ്ങളിലൂട ജനത്തെ തെറ്റിദ്ധരിപ്പിക്കുവാനുള്ള ഗൂഢശ്രമങ്ങളെ സഭാസമൂഹം തീർച്ചയായും തിരിച്ചറിയുമെന്നും ധ്യാനത്തിന്റെയും പ്രാർത്ഥനയുടെയും ചൈതന്യം നിറഞ്ഞ വിശുദ്ധവാരത്തിൽ പോലും സ്വാർത്ഥലക്ഷ്യത്തോടെ അസത്യ പ്രചരണങ്ങൾ നടത്തി രൂപതാദ്ധ്യക്ഷനെയും രൂപതയെയും അധിക്ഷേപിക്കുന്നത് തികച്ചും ഖേദകരമാണെന്നും അദ്ദേഹം പ്രസ്താവനയിൽ പറഞ്ഞു.

        തെറ്റിദ്ധാരണ പരത്തി സഭയിൽ ഭിന്നതയും ആശയക്കുഴപ്പവും സൃഷ്ടിക്കുന്നക്കുന്നവർ ഇത്തരം പ്രവർത്തനങ്ങളിൽ നിന്നും ഒഴിഞ്ഞ് നിൽക്കണമെന്നും അദ്ദേഹം ആവശ്യപ്പെട്ടു