വാഹനങ്ങളുടെ ഫിറ്റ്​നസ്​ പരിശോധനക്ക്​​ ഓട്ടോമേറ്റഡ്​ കേന്ദ്രങ്ങൾ വരുന്നു.

വാഹനങ്ങളുടെ ഫിറ്റ്​നസ്​ പരിശോധനക്ക്​​ ഓട്ടോമേറ്റഡ്​ കേന്ദ്രങ്ങൾ വരുന്നു.

തിരു.: വാഹനങ്ങളുടെ ഫിറ്റ്​നസ്​ പരിശോധനക്ക്​ സംസ്ഥാനത്ത്​ ഓട്ടോമേറ്റഡ്​ കേന്ദ്രങ്ങൾ വരുന്നു. കമ്പ്യൂട്ടർ ബന്ധിത യന്ത്രസംവിധാനത്തിലൂടെ വാഹനങ്ങൾ കയറി ഇറങ്ങിയാലുടൻ ഫിറ്റ്​നസ്​ സർട്ടിഫിക്കറ്റ്​ ലഭിക്കുന്ന വിധത്തിലാണ്​ സെന്ററുകൾ രൂപകൽപ്പന ചെയ്യുന്നത്​. മോട്ടോർ വാഹന വകുപ്പ്​ ഉദ്യോഗസ്ഥർ നേരിട്ട്​ ​പരിശോധിച്ച്​ ഫിറ്റ്​നസ്​ സർട്ടിഫിക്കറ്റുകൾ നൽകുമ്പോൾ ഉണ്ടാകുന്ന കാലതാമസം ഇതോടെ ഇല്ലാതാകും.

       ടാക്സി വാഹനങ്ങൾ രണ്ട്​ വർഷം കൂടുമ്പോൾ ഫിറ്റ്​നസ്​ സർട്ടിഫിക്കറ്റ്​ സ്വന്തമാക്കണം. എട്ട്​ വർഷത്തിലധികം പഴക്കമുള്ള വാഹനങ്ങൾക്ക്​ ഓരോ വർഷവും ഇത്​ നിർബന്ധമാണ്​. മോട്ടോർ വാഹനവകുപ്പ്​ ഓഫീസർമാർ നേരിട്ടെത്തി പരിശോധിച്ച്​ ഫിറ്റ്​നസ്​ ഉറപ്പു വരുത്തുന്നതാണ്​ നിലവിലെ രീതി. പുക, എൻജിൻ, ബോഡി തുടങ്ങി ഓരോ ഭാഗവും ​പരിശോധിക്കാൻ കൂടുതൽ സമയമെടുക്കും. ടെസ്റ്റിങ്​ ഗ്ര‍ൗണ്ടിൽ മിക്ക ദിവസങ്ങളിലും രൂപപ്പെടുന്ന വാഹനങ്ങളുടെ വലിയ നിര ഓട്ടോമേറ്റഡ്​ സംവിധാനം വരുന്നതോടെ ഇല്ലാതാകുമെന്നാണ്​ പ്രതീക്ഷ. എല്ലാ ജില്ലകളിലും ഓട്ടോമാറ്റിക്​ ടെസ്റ്റിങ്​ കേന്ദ്രങ്ങൾ സ്ഥാപിക്കാനാണ്​ മോട്ടോർ വാഹന വകുപ്പ്​ ആലോചിക്കുന്നത്​. ഓരോയിടത്തും വാഹനത്തിന്റെ വിവിധ ഭാഗങ്ങൾ കാര്യക്ഷമമെന്ന്​ പരിശോധിച്ചുറപ്പിക്കും. സർവീസിന്​ യോഗ്യമായ വാഹനങ്ങൾ പരിശോധനാ സംവിധാനത്തിലൂടെ സഞ്ചരിച്ച്​ പുറത്തിറങ്ങുമ്പോഴേ​ക്കും പാസ്​ സർട്ടിഫിക്കറ്റ്​ തയ്യാറായിരിക്കും. ഓട്ടോമാറ്റിക്​ ഫിറ്റ്​നസ്​ കേന്ദ്രങ്ങളുടെ ടെൻഡർ നടപടികൾ പൂർത്തിയാക്കിയതായി ട്രാൻസ്​പോർട്ട്​ കമീഷണർ സി.എച്ച്. നാഗരാജു പറഞ്ഞു.