ഒപ്പറേഷൻ തിയേറ്ററിലെ സീലിങ് അടർന്നു വീണു: തിരുവനന്തപുരം മെഡിക്കൽ കോളേജിൽ ശസ്ത്രക്രിയകൾ മാറ്റി.

ഒപ്പറേഷൻ തിയേറ്ററിലെ സീലിങ് അടർന്നു വീണു: തിരുവനന്തപുരം മെഡിക്കൽ കോളേജിൽ ശസ്ത്രക്രിയകൾ മാറ്റി.

തിരു.: ഓപ്പറേഷൻ തിയേറ്ററിലെ സീലിങ് അടർന്നു വീണതിനെ തുടർന്ന് തിരുവനന്തപുരം മെഡിക്കൽ കോളജിൽ ശസ്ത്രക്രിയകൾ തടസ്സപ്പെട്ടു. പഴയ അത്യാഹിത വിഭാഗത്തിന്റെ ഭാഗത്തുള്ള പ്ലാസ്റ്റിക് സർജറി തിയേറ്ററിലെ സീലിങ് ആണ് കനത്ത മഴയെ തുടർന്ന് അടർന്നു വീണത്. മഴയിൽ ഇവിടെ ചോർച്ച കണ്ടെത്തിയിരുന്നു. സംഭവം നടന്നിട്ട് രണ്ടു ദിവസം ആയെങ്കിലും അധികൃതർ ഇത് പുറത്ത് അറിയിച്ചില്ലെന്ന ആരോപണമുണ്ട്.

          ഇവിടെ അറ്റകുറ്റപ്പണികൾ തീർത്തത് ഏതാനും ദിവസങ്ങൾക്ക് മുൻപ് ആയിരുന്നു. സീലിംങ് വീണത് പ്രവർത്തന സമയത്ത് അല്ലായിരുന്നതിനാൽ ആളപായം ഒഴിവായി. ഇവിടെ നടത്താനിരുന്ന ശസ്ത്രക്രിയകൾ മാറ്റിവച്ചിരിക്കുകയാണ്. ഇത് താൽക്കാലികമായി ദന്തൽ കോളേജിന്റെ ഭാഗത്തേക്ക് മാറ്റാനാണ് തീരുമാനം. സംഭവം ചർച്ച ചെയ്യാൻ തിയേറ്റർ കമ്മിറ്റി വരുന്ന തിങ്കളാഴ്ച യോഗം ചേരും.

      അതേസമയം, മെഡിക്കൽ കോളേജിൽ കൃത്യമായ അറ്റകുറ്റപ്പണികൾ നടത്തി പ്രശ്നങ്ങൾ നിരന്തരം പരിഹരിക്കാറുണ്ടെന്നാണ് ആശുപത്രി സൂപ്രണ്ട് ഡോ. ബി.എസ്. സുനിൽകുമാർ പറഞ്ഞത്.