അഞ്ച് സെമി എലിവേറ്റഡ് ഫ്ലൈ ഓവറുകള്‍ (ഒന്നാംകര, മങ്കൊമ്പ്, നസ്രത്ത്, ജ്യോതി, പണ്ടാരക്കളം) പൂർത്തിയായി ഗതാഗതത്തിന് തുറന്നു കൊടുത്തിട്ടുണ്ട്. 14 ചെറിയ പാലങ്ങളുടെ പുനർനിർമ്മാണവും മൂന്ന് കോസ് വേകളുടെ നിർമ്മാണവും പൂർത്തിയാക്കി ഗതാഗതത്തിന് തുറന്നു നൽകിയിട്ടുണ്ട്. 7 കി.മീ ഭൂമി നിരപ്പാക്കല്‍ പ്രവൃത്തികളിൽ 99 ശതമാനം പൂർത്തിയായി. റോഡ് നിർമ്മാണം 98 ശതമാനം പൂർത്തീകരിച്ചു. നിലവിലുണ്ടായിരുന്ന 8-9 മീറ്റർ വീതിയിലുള്ള ടാർ ഉപരിതലം 10 മീറ്റർ വീതിയുള്ള രണ്ടുവരി പാതയാക്കിയും ഇരുവശത്തുമുള്ള നടപ്പാത കാൽനടയാത്രക്കാരുടെ സുരക്ഷിതത്വം ഉറപ്പാക്കുന്നതിനു വേണ്ടി ഉയർത്തിയും നിർമ്മിച്ചു. നവീകരിക്കുന്ന റോഡിനും ഫ്ലൈ ഓവറിനും വാഹന ഗതാഗതത്തിന് 10 മീ വീതിയുള്ള രണ്ട് വരി പാതയും ഇരുവശത്തും നടപ്പാതയും ഉൾപ്പെടെ 13 മീറ്റർ വരെ വീതിയുണ്ട്. നടപ്പാതയുടെ അടിയിൽ ഒരു വശത്ത് ഓടയും മറുവശത്ത് ഓടയും ഡക്ടും നൽകിയിട്ടുണ്ട്. ജിഎസ്ബി, ഡബ്ല്യൂഎംഎം, ടു ലയർ, ഡിബിഎം, ബിസി പ്രവൃത്തികളാണ് റോഡ് നിർമ്മാണത്തിൽ ഉൾപ്പെടുത്തിയിട്ടുള്ളത്. 5 സ്ഥലങ്ങളിൽ സെമി എലിവേറ്റഡ് ഫ്ലൈ ഓവറുകളും സർവ്വീസ് റോഡും നൽകിയാണ് ക്രമീകരിച്ചിട്ടുള്ളത്. റോഡിന് കുറുകെയുള്ള നീരൊഴുക്ക് സുഗമമാക്കുന്നതിനു വേണ്ടി മൂന്നിടങ്ങളിൽ കോസ് വേ നൽകിയിട്ടുണ്ട്. വലിയ പാലങ്ങളായ കിടങ്ങറ, നെടുമുടി പാലങ്ങൾ ഒരു വശത്തേയ്ക്ക് വീതികൂട്ടിയാണ് പുനർനിർമ്മിക്കുന്നത്.
കുട്ടനാടിന്റെ മണ്ണിന്റെ ഘടന പരിഗണിച്ച് ഏഴ് കി.മീ. നീളത്തിൽ ഭൂമി നിരപ്പാക്കല്‍ പ്രവൃത്തികളും റോഡ് സുരക്ഷയുടെ ഭാഗമായി ക്രാഷ് ബാരിയറും ആവശ്യമായ മറ്റ് അനുബന്ധ സംവിധാനങ്ങളും ലൈറ്റുകളും വെയിറ്റിംഗ് ഷെഡും പുനര്‍നിര്‍മ്മാണത്തിൽ ഉൾപ്പെടുത്തിയിട്ടുണ്ട്. മൂന്ന് മാസത്തിനുള്ളിൽ റോഡ് പൂർണ്ണമായും തുറന്നു നൽകാൻ ലക്ഷ്യമിട്ടാണ് പണികൾ അതിവേഗം പുരോഗമിക്കുന്നത്. പദ്ധതി പൂര്‍ത്തിയാവുമ്പോള്‍ എസി റോഡിന്റെ നിര്‍മ്മാണച്ചെലവ് 880.72 കോടിയാകുമെന്നാണ് കണക്ക്.
0 Comments